مانیٹرنگ ڈیسک
وزیراعلی خیبر پختونخواعلی امین گنڈا پور نے بنوں کی بندشاہراہیں مرحلہ وار کھولنے اورملازمت سے نکالے گئے پولیس اہلکاروں کوبحال کرنے سمیت متعدد اقدامات کرنے کی یقین دہانی کرادی ہے.
وزیر اعلی خیبر پختونخوا علی امین گنڈاپور سے بنوں قومی جرگہ کے وفد نے ملاقات کی۔ ملاقات میں صوبائی وزیر پختون یار خان، ایم این مولانا نسیم شاہ اور ایم پی اے عدنان وزیر کے علاوہ علاقے کے سیاسی و سماجی شخصیات، عمائدین اور علماء وفد میں شامل تھے۔
چیف سیکرٹری اور ایڈیشنل چیف سیکرٹری داخلہ خیبر پختونخوا کے علاوہ متعلقہ کمشنر اوردیگر حکام موجود تھے۔ ملاقات میں بنوں میں امن و امان کی موجودہ صورتحال اور متعلقہ امور پر تبادلہ خیال کیا گیا۔ وفد نے گزشتہ روز بنوں میں منعقد ہونے وال قومی جرگے کے مطالبات سے وزیر اعلی کو آگاہ کیا۔ وفد نے بنوں میں سڑکوں کی بندش سے علاقے کے لوگوں کو درپیش مشکلات سے بھی وزیراعلی کو اگاہ کیا۔
وزیر اعلی کا بنوں قومی جرگے کے مطالبات سے اصولی اتفاق کرتے ہوئے کہا کہ دہشتگردوں کے خاتمے تک انٹیلجنس بیسڈ آپریشن جاری رہینگے۔
ملاقات میں مطالبات کے حل کے لئے لائحہ عمل تیار کرنے اور برخواست شدہ پولیس اہلکاروں کی بحالی، فورتھ شیڈول اور 3 ایم پی او وغیرہ سے متعلق معاملات کے حل کے لئے کمیٹی تشکیل دینے کا فیصلہ کیا گیا جبکہ جرگہ اراکین نے علاقے میں امن کے قیام کے لئے حکومت کو مکمل تعاون فراہم کرنے کی یقین دہانی کرائی۔ وزیر اعلی علی آمین گنڈا پور نے کہا کہ صوبائی ایپکس کمیٹی کے منظور شدہ 16 میں سے 12 نکات پر عملدرآمد کیا گیا ہے باقی چار مطالبات پر عملدرآمد کے لئے کوششیں جاری ہیں۔ بنوں شہر میں عوام کی آمدورفت کے لئے بند سڑکوں کو مرحلہ وار کھولنے کے لئے طریقہ کار وضع کیا جائے گا۔ دہشتگردی کے خاتمے کے لئے عوام کا اعتماد بہت ضروری ہے۔
ہم سسٹم پر عوام کا اعتماد بحال کرنے کے لئے اقدامات کر رہے ہیں علاقے کے عوام علاقے سے دہشتگردوں کو نکالنے کے لئے حکومت کے ساتھ تعاون کریں۔ صوبے کے کسی بھی علاقے میں ملٹری آپریشن نہیں ہو رہا تاہم دہشتگردوں کے خاتمے کے لئے اینٹیلجنس بیسڈ آپریشنز جاری رہیں گے۔ دہشتگردی کے خلاف پولیس کو لیڈ رول دیا جا رہا ہے اور اس سلسلے میں پولیس خصوصا سی ٹی ڈی کو مستحکم کیا جارہا ہے۔
